Alguén comentoume que o Concello de Lugo, diante do estado de obras da cidade, ten advertido que non se fará cargo dos danos sufridos polos viandantes nos accidentes que ocurran ao camiñar pola zona de guerra na que se ten convertido boa parte do recinto amurallado.
No caso de que eso fose certo – que parece discutible ao ser obrigado itinerario o espazo afectado por esta especial Dana – entendo que segundo as obras se vaian rematando así o espazo volverá a ser territorio liberado, como se supón que é o caso da rúa Quiroga Ballesteros, aínda que conserve feridas producidas no conflito.
Nese escenario, un amigo sufríu caída importante, a resultas da que ten fracturadas tres costelas, polo que entendo non fixo reclamación por considerar que foi algo fortuito. Pero no mesmo lugar fun a pasada semana testemuña dunha evidencia do problema. Unha lucense, manifestamente máis áxil do que puidera parecer, tropeza nunha intersección que (tectónica de placas?) presenta un escalón de varios centímetros, e a resultas do tropezón bota a correr para non caer, conseguindo a verticalidade despois duns axitados pasos, parándose despois a mirar cara atrás como se non acabase de crer a sorte de non estamparse contra o chan.
Non digo que deban abrir no concello unha linea especial de axudas para atención dos damnificados, senón atacar o mal de raiz para ir solucionando problemas que o tráfico vai creando, comezando por sinalar os casos máis ostensibles. Porque en calquera momento pode pasar un accidente serio que, previa reclamación legal, poida facer saltar a banca no concello.
