Antón Luaces.- O Ministerio de Pesca e o sector do cerco do Cantábrico noroeste acordaron medidas de xestión para a costeira da anchoa de 2025 que garanten a actividade de todos os operadores, ao se reservar un 10% da cota para as embarcacións non vencelladas a unha entidade de representación. O Ministerio elaborará unha orde para incorporar as novas medidas acordadas á pesqueira do bocarte, que se abriu o pasado luns.
A secretaria xeral de Pesca, Isabel Artime, acadou o acordo co sector cerqueiro citado, a partir da proposta presentada pola asociación de organizacións de produtores Opescantábrico que aglutina ao 90% da produción, e que consiste na distribución dun límite do 96% das capturas entre as súas entidades asociativas, de xeito que cada unha delas podería regular o ritmo da pesqueira e o volume de desembarques, coa fin de optimizar o aproveitamento da cota dispoñible.
O consenso acadado para acordar ese modelo de xestión e ampliar o límite de capturas do 4% ao 10% para aqueles operadores que non están vinculados a estas entidades asociativas e que non estaban no acordo inicial. Así se asignou un 90% de límite de captura ás entidades representativas de Opescantábrico.
Esta distribución de límites de capturas non dará lugar á consolidación de dereitos de cara a un futuro posible reparto da cota do bocarte.
Téntase, con esta medida, paliar as descargas masivas de exemplares de bocarte de tamaño pequeno e de baixa cotización detectada nos primeiros días de campaña de anos anteriores, e con esto mellorar a rendibilidade de todos os buques que participen na pesqueira.
O novo modelo de xestión terá en conta que, unha vez comezada a campaña, as capturas realizadas ata a publicación da futura norma van computarse conforme aos límites que se establezan na mesma.
A cota de anchoa para este ano é de máis de 28.600 toneladas.
