Turismo de Galicia publicou a licitación das obras de mantemento e rehabilitación do conxunto monumental Torres de Oeste no Concello de Catoira, acción enmarcada no Plan Xacobeo NextGeneration posto en marcha por Turismo de Galicia con fondos europeos para a rehabilitación e mellora de Bens de Interese Cultural de titularidade pública vencellados ao Camiño de Santiago. As empresas terán ata o 15 de abril para presentar as súas propostas e o importe da licitación ascende a 420.450,80 euros. A actuación licitada inclúe o retellado da cuberta da igrexa, restauración da imaxe do Apóstolo Santiago, colocación de novas portas, mellora do badalado da campá e colocación dun panel informativo exterior. Instalarase tamén unha nova caseta informativa, procederase á desmontaxe de pórticos da pérgola e recolocación de columnas como borde lateral de camiños e acondicionamento do paseo. Ademais, mellorase a iluminación exterior existente e realizarase o mantemento das zonas axardinadas.
