O Colexio de Arquitectos de Galicia deu a coñecer as obras finalistas da XXI edición dos Premios COAG de Arquitectura, que contou coa candidatura de 243 propostas visadas, executadas e finalizadas entre o 1 de outubro de 2022 e o 30 de setembro de 2024.
Na listaxe atopamos tres propostas da nosa contorna. En primeiro lugar e na categoría de deseño de espazos urbanos, o proxecto Mellora do bordo da praia de Porto do Son (Juan José Creus Andrade, Covadonga Carrasco López, Marcial Rodríguez Rodríguez e José Martín Valladares Durán e Alberto Redondo Porto). En segundo lugar, na modalidade de vivendas unifamiliares atopamos a Casa Panchés de Carnota (proxecto de Óscar Andrés Quintela e Iván Andrés Quintela, de Arrokabe). Por último, na categoría de proxectos de fin de carreira, o xurado seleccionou Usos híbridos no polígono industrial: Fitodepuración no Polígono da Tomada, a cargo de Laura Pena.
O decano do Colexio de Arquitectos de Galicia, Luciano Alfaya, preside o xurado composto pola arquitecta Carmen Pinós; o arquitecto Alfonso Penela; a arquitecta Filipa Guerreiro; o urbanista e presidente da Agrupación de Arquitectas e Arquitectos Urbanistas de Galicia, Alfonso Díaz; e a escritora Blanca Riestra; ademais de actuar como secretario –con voz pero sen voto– o vogal de Cultura da Xunta de Goberno do COAG, José Luis Gil Pita.
Unha vez analizadas todas as candidaturas, o xurado escolleu primeiramente 102 obras como proxectos seleccionados, para finalmente elixir como finalistas 47 obras entre as seguintes categorías: vivenda unifamiliar, 5; vivenda plurifamiliar, 4; outros edificios, 4; obras de rehabilitación patrimonial e restauración, 5; obras de deseño interior, 4; arquitecturas efémeras e deseño, 4; planificación urbana, 4; deseño de espazos urbanos, xardinaría e paisaxismo, 4; divulgación e investigación, 6; Proxecto Fin de Carreira, 3; e obra no exterior, 4.
As propostas gañadoras daranse a coñecer nun acto no Palacio de Congresos e Exposicións de Galicia, en Santiago de Compostela, o vindeiro 5 de abril, que é o punto de encontro bienal de todos os sectores da Arquitectura, no que se xuntan, ademais de arquitectos e arquitectas, promotores, industrias e construtores para coñecer as mellores propostas de arquitectura e urbanismo realizadas desde Galicia. Esta edición dos premios está patrocinada por Finsa, Cortizo, Bandalux e Aluman.
O decano do COAG, Luciano Alfaya, subliñou a importancia de manter este premios, iniciados en 1987, desde a actualización de referencias e a incorporación de novas categorías. Así mesmo, destaca, nesta edición, “o elevado número e a calidade dos proxectos presentados, en especial en vivenda e rehabilitación, o que dá conta da importancia de ambos eidos na actual arquitectura galega”.
“Os premios COAG son una mestura de tradición e innovación. Mantéñense os obxectivos fundacionais de recoñecer e divulgar o mellor da arquitectura galega. Pero precisamente porque a arquitectura galega é unha realidade dinámica e en constante evolución, os premios teñen que estar abertos a recoller eses cambios”, asegura o decano.
