A directora xeral de Persoas con Discapacidade visita o novo local da Creba en Noia
Esta mañá, a directora xeral de Persoas con Discapacidade, Begoña Abeijón, visitou o novo local da Creba en Noia, un espazo que permitirá ampliar os servizos destinados á atención das persoas con enfermidades mentais. O proxecto inclúe a creación dun centro ocupacional e dunha minirresidencia, e contou co apoio da Xunta de Galicia, que xa destinou máis de 350.000 euros para esta iniciativa.
Abeijón destacou que, no ano 2023, o Executivo galego concedeu unha achega de 150.000 euros a través das axudas do IRPF para que a entidade adquirise o inmoble. No ano seguinte, destináronse máis de 200.000 euros, tamén con cargo ao 0,7% do IRPF, para a adecuación e acondicionamento do local.
Durante a visita, a directora xeral coñeceu de preto os traballos realizados no centro ocupacional, orientados a mellorar e potenciar as capacidades dos usuarios. Neste sentido, resaltou que o goberno galego financia 8 prazas neste servizo, cun investimento de preto de 60.000 euros.
A directora xeral subliñou o compromiso da Xunta de Galicia co reforzo dos servizos de atención e coidado, así como coa promoción da autonomía das persoas con discapacidade. Abeijón agradeceu o esforzo da asociación A Creba e enxalzou o seu labor na integración sociolaboral das persoas con problemas de saúde mental.
