O concurso de curtametraxes da nosa comarca, o Certame de Curtas Alberto Romero, está a piques de celebrar unha década de actividade, e para conmemoralo culminará este frutífero período de traballo creativo nunha gala especial no Auditorio de Ribeira, que incluirá a entrega dos galardóns mesturados con humor e música e, por suposto, de curtas. Na presentación da gala (celebrada este venres 28 de marzo) participaron a concelleira de Cultura de Ribeira, Antía Alberte, a concelleira de Promoción Económica, Genoveva Betanzos máis o presidente da entidade, Santiago García.
O certame audiovisual de curtas Alberto Romero naceu como unha iniciativa da ANPA Caramecheiro do IES Nº1 de Ribeira no ano 2016, como homenaxe o traballo e dedicación social de Alberto Romero (1961-2015). A esta iniciativa sumáronse decontado as ANPAs San Roque do IES Leliadoura e ANPA do CEIPP de Palmeira, así como a A.C. Lajareu por Barlovento, asociacións das que Alberto formou parte, entre outras.
A concelleira de Cultura anunciou que esta Gala celebrarase o sábado 26 de abril ás 19:00 h onde haberá entrega de premios, música, humor xunto coa proxección das curtas premiadas. A gala será presentada por Fany Pérez e Vanesa Ordoñez e tamén haberá unha banda especial para a ocasiónconformada por Thais Suki, Helena Figueiras, Marga Loureda, Daniel Martís, Chumi, Juan Ciego e José Andrés Mariño. Os artistas convidados serán: Antonio Bermo, Flow do Norte, Sandra Folgar, Brumeigho Folk, El Clan de los Impostores, Sue Moreno e Lidia Veiga.
Antía Alberte sinalou que “este certame está aberto aos institutos pero tamén hai agora unha categoría libre e outra para centros de diversidade”. Engadiu “que é un certame que ten a intención de achegar ao mundo audiovisual á mocidade para que expresen diferentes temáticas a través do vídeo”. A concelleira rematou resaltando que “como palmeirá teño que dicir que é un orgullo celebrar esta actividade impulsada principalmente dende a miña vila e estar agora aquí como concelleira presentándoa; penso que Alberto estaría orgulloso do que se conseguiu”.
Pola súa banda, Santiago García amosou a súa ledicia por volver a Ribeira: “Estamos presentando esta gala que culmina na nosa actividade durante todo o ano, agora mesmo o xurado acaba de facer o seu traballo”. Falou da gala salientando que “isto vén sendo unha festa coma os Óscars, os Goya, para dar o seu minuto de gloria á xente que participou e estamos moi contentos de volver a Ribeira que foi onde naceu este certame, e desta vez, temos máis de catrocentos asentos porque sempre se pelexa a xente polas entradas que son de balde”.
O número total de curtas que se presentaron foron 45. Seguindo este fío, García sinalou “que non é a edición coa maior número de curtas presentadas pero quero facer fincapé na calidade”. As bases do concurso son de temática libre pero si que se valora a crítica social, a lingua galega “pero son de libre composición” engadiu García.
As categorías son primaria, secundaria, diversidade e unha libre para os máis profesionais. García explicou que engadiuse nesta edición unha nova modalidade relacionada co mar proposta pola Mancomunidade Barbanza Arousa. Hai 1.800 euros en premios e repártense nas categorías a 300 euros agás na libre que é de 600 euros.
