Museos e coleccións é o título da cuarta xornada do ciclo Arte en tempo real que organiza este mércores 26 de febreiro (16:30 horas) a Sección de Creación e Artes Visuais Contemporáneas do Consello da Cultura Galega, que coordina Paula Cabaleiro. O director da Fundació Foto Colectania de Barcelona, Pepe Font de Mora; a directora do Museo de Pontevedra, Ángeles Tilve e o director do Museo de Artes do Gravado á Estampa Dixital (Ribeira), Xoán Pastor Rodríguez, son algúns dos especialistas que asisten a esta cita que analiza a estrutura do sistema artístico. Rosario Sarmiento e Sofía Santos coordinan esta xornada presencial e que pode seguirse en directo a través da web e das redes sociais da institución.
Nesta cuarta xornada abórdase o papel dos museos e das coleccións de arte, pezas fundamentais da estrutura do sistema artístico.
A xornada comeza cun relatorio a cargo de Pepe Font de Mora, director de da Fundació Foto Colectania de Barcelona, unha entidade moi premiada que é un referente no eido da fotografía. Após a súa intervención falará Xoán Pastor Rodríguez, director do Museo de Artes do Gravado á Estampa Dixital, centro sito en Artes (Ribeira, A Coruña) que se encarga da colección, catalogación (a día de hoxe conta con 29.000 estampas), estudo e difusión da arte gráfica dende as súas orixes ata os nosos días. Destaca tamén por recoller a variedade de técnicas artísticas que operaron desde o século XV ata o momento actual. Na súa colección hai obras de artistas internacionais como Goya, Rubens, Van Dyck, Toulouse-Lautrec, Saura, Ricardo Baroja, Eberhard Schlotter, Dalí, Alberti, Picasso… así como gravadores galegos como Alfonso Costa, Manuel Ayaso ou Novoa entre outros.
A segunda parte da xornada consta dunha mesa redonda Museos e coleccións en Galicia: presente e futuro, na que participarán Ángeles Tilve e Javier Buján, responsábeis do Museo de Pontevedra e a Fundación Laxeiro; xunto coa galerista Chus Villar, directora da única galería galega que participa na vindeira edición de ARCO 2025. Tamén participa o coleccionista Juan Outeiral Bar. A idea é abordar a situación actual e os parámetros cos que revisar os novos horizontes do coleccionismo na nosa comunidade.
Cinco citas coa situación da arte
Arte en tempo real é un ciclo de cinco xornadas que pretende coñecer, en boca dos seus protagonistas, o estado actual da arte na nosa comunidade. No outono de 2024 analizouse a difícil situación que viven os artistas e o comisariado a nivel actual. En 2025 falouse do papel actual das galerías de arte e o ciclo pecha en marzo cunha xornada sobre publicacións.
