Este mércores 26 de febreiro, o Laboratorio Ecosocial do Barbanza organizou un encontro en Rianxo de cinco proxectos seleccionados pola Fundación Biodiversidade do Ministerio para la Transición Ecológica y el Reto Demográfico (MITECO).
A xornada foi dirixida a mostrar o proceso de traballo destas iniciativas innovadoras, ofrecendo unha visión en profundidade sobre proxectos que están a promover a transformación da xestión dos montes de Galicia. A cita foi no Centro Cultural Vicente Vidal de Leiro, en Rianxo.
As entidades levan anos traballando en colaboración coas comunidades locais, desenvolvendo modelos que contribúan á preservación do medio ambiente e ao desenvolvemento rural do territorio galego.
Os proxectos seleccionados son:
-Laboratorio Ecosocial do Barbanza: Promove unha transición cara á sustentabilidade medioambiental e o aumento da resiliencia na xestión territorial dos montes do Barbanza.
-CAPRIF-CC: Traballa no fortalecemento das capacidades das comunidades rurais a través da formación, a sensibilización, a aplicación de novos sistemas de gobernanza e o desenvolvemento de accións piloto innovadoras.
-Servizos Ecosostémicos Montes Periurbanos de Vigo: Aborda o reto de harmonizar o uso social e o aproveitamento económico dos montes co fin de garantir a súa conservación.
-Mixturando: Desenvolve novas estratexias para a valorización do bosque mixto Atlántico en espazos protexidos de Galicia e Asturias.
-RuraltXa: Impulsa a bioeconomía rural mediante a revalorización da gandería extensiva de montaña, vinculándoa á conservación da biodiversidade.
A partir das 11:30 horas, as persoas asistentes participaron nunha saída de campo para visitar as accións do proxecto Laboratorio Ecosocial do Barbanza. Esta actividade permitiu observar de primeira man as boas prácticas implementadas e os resultados acadados, promovendo o intercambio de coñecemento e experiencias.
