Logo de meses de negociación, na mañá deste 17 de febreiro o Goberno local e o Comité de Empresa do Concello de Boiro acordaron a modificación da Relación de Postos de Traballo (RPT). O alcalde, José Ramón Romero, presidiu a mesa de negociación na que participaron a concelleira de persoal, María Outeiral; o tenente de alcalde, Luís Ruiz; o concelleiro, Marcos Fajardo; membros do comité e representantes dos principais sindicatos.
Esta proposta, que será levada ao pleno para a súa aprobación por parte da Corporación local, implica unha modificación dos organigramas e funcións, así como unha actualización dos soldos e salarios dos traballadores e traballadoras municipais, para o que se vai destinar arredor dun millón de euros. “Facía máis de 20 anos que non se fixera unha revisión salarial dos empregados municipais”, afirmou o alcalde.
O acordo ratificado na mesa de negociación celebrada na mañá deste 17 de febreiro responde aos resultados da votación realizada na asemblea xeral, na que un 78% dos traballadores e traballadoras que participaron votaron a favor da proposta do Goberno local.
Este documento é o resultado dun traballo realizado polo goberno local e o Comité de Empresa xunto cos departamentos municipais de Secretaría, Intervención e Persoal. “É un documento ambicioso que levou meses de negociación pero que responde e unha demanda de anos dos empregados municipais e a unha necesidade de dar resposta ás novas necesidades xurdidas no Concello”, recoñeceu o alcalde.
