O Goberno local de Boiro, aproveitando a visita ao municipio do conselleiro de Educación, Román Rodríguez, celebrada a pasada fin de semana, trasladoulle as deficiencias que presentan os centros escolares do municipio e que, segundo lle fixeron saber, “requiren da colaboración da Xunta de Galicia”.
Nunha breve conversa indicáronlle ao conselleiro que “son moitas as carencias dos centros escolares que exceden o mero mantemento e que precisan de atención por parte da Consellería que dirixe”. Os representantes municipais trasladáronlle as necesidades rexistradas en todos os centros pero especialmente fixeron fincapé no CEIP Praia Xardín que, segundo apuntaron, “require atención de urxencia”, tal e como indica o informe técnico do que se lle fixo entrega e que detalla as eivas, necesidade e perigos que presenta o centro escolar, “un dos máis antigos do concello”, lembraron.
Ao remate da conversa, os representantes da administración quedaron en manter unha xuntanza na que poder valorar máis polo miúdo as necesidades dos centros e as distintas fórmulas para poder facer fronte ás mesmas.
