O Concello de Rianxo, a través do Servizo de Xuventude, organiza un curso de lingua de signos. Será unha formación de trinta horas correspondente ao nivel A1.1. O curso está dirixido á mocidade de 16 a 35 anos empadroada en Rianxo, se ben poderán acceder outras persoas no caso de que queden prazas dispoñíbeis, segundo confirmou a concelleira Ana Vidal, responsábel de Benestar Social, Igualdade, Maiores e Xuventude.
As persoas interesadas en participar na actividade teñen até o 2 de marzo para facelo. Na web municipal teñen toda a información que precisen sobre o curso. Este celebrarase os días 11, 13, 18, 20, 25, 27 de marzo; 1, 3, 8, 10 de abril (martes e xoves), en horario de 16.30 a 19.30 h. As clases (30 horas de contidos) levaranse a cabo Aula Centro Sociocultural – Auditorio de Rianxo. Segundo confirmou a concelleira na presentación deste curso, o prezo será de 50 euros con versión reducida de 35 euros para persoas en situación de desemprego, estudantes, membros de familias numerosas, persoas con discapacidade e persoas vítimas de violencia de xénero).
