Este venres 14 de febreiro a Cidade da Cultura vai acoller a xornada de presentación do número inaugural da revista Foro Galicia e Valle-Inclán. Publicación de Estudos sobre Ramón del Valle-Inclán, promovida por esta entidade homónima, presidida polo pobrense Antonio González Millán. A cita será este venres a partir das 12:30 h, na aula 1, da Cidade da Cultura de Galicia.
O Foro Galicia e Valle-Inclán é un proxecto de interese integrador, xurdido do empeño pola democratización da investigación e do coñecemento en col da biografía, xenialidade e obra literaria do escritor máis internacional de Galicia. En síntese, da necesidade de promover a salvagarda do rigor, o estudo das fontes contemporáneas e a divulgación do fenómeno cultural valleinclaniano alén de cativos localismos impropios ao ronsel dun artista universal.
Para os impulsores do foro, Ramón del Valle-Inclán é ese gran artista da palabra cuxa identidade e estilo poliédricos non precisan de pseudónimo para ser recoñecido dentro das letras mundiais. “O seu protagonísmo e carácter internacional son produto dun sobranceiro intercambio de experiencias humanas e literarias que gardan especial relación con Galicia, mais maceradas intelectualmente co estímulo, aprendizaxe e reforzo daquelas nacións nas que descobre e cultiva estilos e ideas que conforman o sentido do mundo que contemplamos ao longo da súa traxectoria”, sinalan.
O sumario deste primeiro exemplar inclúe traballos de investigación de Herminio Valdecañas, Notas de amizade e manuscritos: Rubén Darío e Ramón del Valle-Inclán; Víctor Viana Pedro Seoane Varela; e Xaquín del Valle-Inclán, Epitalamio, a crítica e un dó non celebrado. Trátase dunha revista en edición bilingüe, ao estar destinada ás persoas lectoras de Galicia e das Comunidades de España, así como do exterior, con patrocinio da Dirección Xeral de Cultura, Consellería de Cultura, Lingua e Xuventude, Xunta de Galicia. Sendo responsábel da coidada tradución ao galego Rocío Viéitez Ferro.
