Proseguen na segunda metade desta semana as actividades da Mostra de Teatro Escolar da Pobra do Caramiñal, edición 2025. Será este xoves 6 de febreiro no Teatro Cine Elma a partir das 11.00 horas. Representarase a obra A mestra da lingua, da compañía Duende Sico, dirixida ao alumnado de infantil da gardería Monte Carmelo e das unitarias do Vilariño, Granxa e Campo-Angustia.
Trátase dun espectáculo teatral ambientado nunha aula onde a profesora Tomasa explica coa axuda dos seus simpáticos alumnos, a importancia de usar a lingua galega. Tamén explica de maneira sinxela, interactiva e visual como non deben ter prexuízos nin estereotipos sobre a lingua galega.
A través de xogos, contos, textos de autores infantís galegos, proxeccións e monicreques…. a profesora Tomasa fomenta entre os máis pequenos o uso da súa lingua, ao mesmo tempo que lles inculca o concepto de non ter prexuízos lingüísticos.
Organiza a concellaría de Cultura da Pobra do Caramiñal en colaboración coa Rede Cultural da Deputación da Coruña.
