O Concello de Dodro preparou unha intensa axenda de actividades para celebrar o Día de Rosalía de Castro, o 23 de febreiro: unha axenda que achegará homenaxes á nosa poeta inmortal, vital e literariamente moi vencellada ás terras de Dodro. As actividades desenvolveranse entre o 21 e o 23 de febreiro.
O venres día 21 de febreiro, as cinco e media da tarde na Casa da Cultura, representarase o espectáculo Os Cantares de Rosalía con María Faltri. Trátase dunha cita musical para público familiar, pertencente á Rede Cultural da Deputación da Coruña.
Tamén o día 21 na Biblioteca Municipal, centros de ensino e servizos municipais repartirán marca páxinas conmemorativos do Día de Rosalía.
Os días 21, 22 e 23 os establecementos hostaleiros do concello achegarán aos seus clientes degustacións do tradicional Caldo de Gloria en homenaxe a Rosalía de Castro (para quen non o saiba, o Caldo de Gloria está inspirado no poema Miña casiña, meu lar na que a poeta explica como facer un caldo humilde e no que se relata a épica diaria da supervivencia)..
