A delegada da Xunta, Belén do Campo, e a alcaldesa de Lousame, Teresa Villaverde, visitaron este luns 3 de febreiro a Farmacia Tállara, onde a delegada debullou os apoios autonómicos destinados a reducir a factura eléctrica dos negocios e das empresas do sector servizos. Belén do Campo explicou que a farmacia Tállara foi beneficiaria, o ano pasado, do Bono Enerxía Peme, o que lles permitiu “instalar equipos de climatización e luminarias LED”, dixo. “Sodes unha mostra da implicación do noso empresariado co aforro enerxético e a sustentabilidade” subliñou. Neste senso, destacou que, no 2024, recibiron estas axudas 174 solicitantes por un importe de máis de 700.000 euros na provincia da Coruña e na comarca do Barbanza o Bono Enerxía Peme permitiu realizar 26 actuacións de eficiencia e aforro de enerxía en negocios cun apoio da Xunta de máis de 81.000 euros.
A delegada explicou que a Xunta ten aberta unha nova convocatoria -a quinta- desta orde cun orzamento de 2,5 millóns de euros e animou ao posíbeis beneficiarios a solicitalas. “Queremos concienciar á sociedade da importancia do aforro e a eficiencia enerxética, pero tamén diminuír o consumo de enerxía e reducir a factura eléctrica de pemes e autónomos, para aumentar a súa competitividade”, apuntou, engadindo que “as axudas poderán solicitarse ata o 25 de xuño” e que a previsión é “chegar con este investimento a máis de 600 traballadores e traballadoras autónomas e pemes galegas; e xerar aforros enerxéticos de ata 2.800 MWh/ano, e económicos de 0,5 M€/ano na factura eléctrica”. O investimento mínimo para poder acceder a estas axudas é de 1.000 euros e a intensidade do apoio será do 80% ata un máximo de 6.000 euros por centro de traballo.
A delegada lembrou que en cinco anos “levamos investidos máis de 13 millóns de euros” cos que se realizaron máis de 3.100 actuacións de eficiencia e aforro de enerxía en Galicia. En definitiva, dixo, “o noso obxectivo é avanzar cara á descarbonización e depender menos dos combustíbeis fósiles”.
Pola súa banda, Teresa Villaverde aproveitou para “animar ao resto de establecementos a que se acollan a estas axudas e lembrar que se precisan de axuda poden acudir ao Concello de Lousame. Son fondos que ás veces quedan sen utilizar porque a xente non os pide. O que queremos é animar á xente de Lousame, cun exemplo próximo como o de Valentina, para que acuda a eses fondos e conseguir axudas para o aforro enerxético”. Villaverde estivo acompañada polos concelleiros de Obras, Ramón Martínez, e Cultura, Silvia Agrafojo.
Finalmente, Valentina Domínguez explicou que cambiaron a luz que tiña por LED e instalaron a maiores un alumeado lateral para ter maior iluminación na farmacia, ademais de cambiar a calefacción por gasóleo por unha bomba de frío-calor. “O aforro enerxético ao longo do ano pasado foi un pouquiño máis do 50% e incluso chegamos ao 70%”, explicou Domínguez, quen recibiu unha axuda do 80% do investimento realizado.
