Banco Santander e a Asociación de Empresarios de Ribeira, que representa a máis de 200 asociados locais, asinaron un acordo estratéxico co obxectivo de fomentar o crecemento económico e apoiar ás persoas autónomas e aos comercios do dito concello do Barbanza. Este convenio permitirá aos emprendedores e pequenos comercios de Ribeira acceder a unha serie de recursos financeiros, asesoramento especializado e ferramentas innovadoras que, segundo fixo saber a entidade bancaria, “facilitarán o seu desenvolvemento e sustentabilidade”.
Nun plano máis concreto, Banco Santander ofrecerá programas de formación, liñas de crédito adaptadas ás necesidades dos pequenos empresarios e solucións tecnolóxicas para mellorar a eficiencia operativa dos negocios.
O presidente da asociación, Francisco Manuel Martinez Gude, destacou a importancia desta alianza: “Este acordo representa unha oportunidade única para fortalecer e proporcionar aos nosos asociados o apoio necesarios para afrontar os desafíos do mercado actual. Estamos agradecidos polo compromiso de Banco Santander coa nosa comunidade e confiamos en que xuntos lograremos grandes resultados”.
Pola súa banda, Carlos Otero, director de Banco Santander en Ribeira, sinalou: “Estamos entusiasmados por esta colaboración coa Asociación de Empresarios de Ribeira. O noso obxectivo é contribuír ao desenvolvemento económico local e ofrecer solucións que axuden ás persoas autónomas e aos pequenos comercios a prosperar. Cremos finalmente que, traballando xuntos, podemos crear unha contorna empresarial máis robusta e resiliente”.
O acordo que entra en vigor de inmediato, incluirá unha serie de iniciativas conxuntas que se darán a coñecer aos asociados nos vindeiros días, e que foron deseñadas para “abordar as necesidades específicas dos empresarios de Ribeira e promover un crecemento sostíbel do tecido produtivo”.
