A Xunta e a Fundación RIA lanzaron oficialmente este 18 de febreiro en Santiago os Encontros de Mercado para potenciar o valor das prazas de abastos no comercio de produto de proximidade. Esta iniciativa consiste “nun programa de encontros internacionais que se desenvolverán ata o 22 abril de 2025 para potenciar o valor dos mercados tradicionais na cultura gastronómica”. A xornada deste martes 18 continuará esta tarde coa conferencia impartida pola arquitecta británica Carolyn Steel, á que asistirá o conselleiro de Emprego, Comercio e Emigración, José González. A estrutura destas xornadas, como a deste martes con Carolyn Steel (na que tamén participaron o arquitecto e impulsor da Fundación RIA David Chipperfield, e o seu director, Manuel Rodríguez) consta dunha visita ao mercado co chef á fronte dos restaurantes A Cantina de Casa RIA e Abastos 2.0, Iago Pazos, para coñecer de primeira man os produtos de tempada e proximidade dispoñíbeis. Na xornada tamén participou o director xeral de Comercio, Gabriel Alé
A programación dos Encontros de Mercado completarase o 20 de marzo coa presenza da cofundadora do restaurante Rivers Café en Londres, Ruth Rogers e rematará o 22 de abril coa participación dun conxunto de chefs galegos.
Esta iniciativa desenvólvese no marco da exposición dedicada ás prazas de abastos, que visitou recentemente o conselleiro de Emprego Comercio e Emigración e que está aberta ao público durante o primeiro trimestre deste ano en Casa RIA (a sede da Fundación RIA na rúa Virxe da Cerca de Santiago). Con ela ponse en valor o importante rol social e económico que teñen os diferentes mercados en Galicia.
