A asociación inclusiva da nosa comarca Amicos e a Asociación para el Progreso de la Dirección (APD) organizaron este mércores 5 de febreiro o encontro Impacto social y rentabilidad: cómo poner en marcha una transformación sostenible, no que se deron cita máis de oitenta directivos e directivas. No evento, celebrado en Nordés Club Empresarial da Coruña, distintos profesionais compartiron a súa experiencia para aclarar se é compatible a rendibilidade cunha actividade que xere impacto social e ambiental.
O encontro arrincou cunhas palabras de apertura da man da directora en Galicia de APD, Mercedes González, o director xeral de Amicos, Xoán España, e o director de Nordés Club Empresarial, Gabriel Barrós.
Durante a súa intervención, España destacou que “debemos pensar a longo prazo, e debemos analizar e ver que as empresas que conseguiron resistir ao paso do tempo son aquelas que practican unha boa xestión, que coidan ás persoas e que son respectuosas co medio ambiente. Debemos buscar o carácter transformador positivo, e para iso o futuro está nas alianzas, a clave da innovación e do éxito está en crear sinerxías con outros actores, porque sós é moi difícil que poidamos levar proxectos grandes adiante”.
A continuación foi a quenda do relatorio Avaliación de impacto ESG na Directiva CSRD, conducido por Silvana Alfaya, directora de sustentabilidade e bo goberno de KPMG en Galicia. Durante a súa intervención, Alfaya sinalou que “as empresas deberán transformarse e dar resposta á taxonomía da Unión Europea”, tralo que salientou a integración dos criterios ESG (Enviromental, Social and Governance) na cultura da empresa e na cadea de valor como os grandes retos aos que se enfrontan as pequenas e grandes empresas.
A experta destacou que a directiva sobre información corporativa en materia de sostibilidade “é un cambio de paradigma, apoiase na rendición de contas en tódolos aspectos relacionados co impacto que produce unha corporación: traballadores, consumidores, comunidade… Esta aplica as mesmas regras para toda Europa, e conduce a que a información reportada vaia encamiñada á prospección, a sinalar cara a onde se dirixe a compañía e como está traballando para acadar os seus obxectivos”.
Tras esta intervención de contexto, realizouse unha mesa redonda sobre o impacto da ESG na estratexia das compañías. Moderada por Miguel Beiro, responsábel da área de Alianzas con Persoas e Empresas de Amicos, nela participaron a directora de RSE, Comunicación e Estudos de mercado de Vegalsa-Eroski, Gabriela González; e a directora de Comunicación e Sostibilidade de ALUMAN, Carla Faginas.
Con respecto ao grado de concienciación das empresas con respecto á sustentanbilidade, Faginas sinalou que “tanto en Europa como en España estamos moi concienciados, quizais o que máis costa é que o ámbito financeiro vexa a sustentabilidade máis como unha inversión que coma un gasto, pero un estudo realizado entre grandes directivos europeos sinala que o 84% consideraban esta como motor de crecemento”. Asemade, destacou que “a sustentabilidade ten que estar integrada na estratexia das compañías, debemos deixar de vela como algo altruísta e comezar a vela como o motor de medre que é”.
Pola súa banda, Gabriela González destacou que “cando falamos de negocios aquí falamos dun gran número de pemes, e nelas é onde se respira a idea do legado, do impacto. A esencia dunha empresa debe ser facer as cousas cada vez mellor e da maneira máis sostíbel, e para iso debemos ter moi claro que a eficiencia tamén é sostibilidade”.
Despois desta análise, celebrouse unha mesa de debate centrada en como as empresas aplican os criterios ESG, na que interviñeron Javier Castiñeira, xefe global de Saúde, Seguridade e Medio ambiente & Sostibilidade de RESONAC, María Sande, xefa de Comunicación Noroeste Iberia en Coca-Cola Europacific Partners, e Mariví Sánchez, directora de Sostibilidade e Comunicación de Nauterra España, do Grupo Calvo. Os tres participantes destacaron “o poder das alianzas para conseguir que os cambios teñan lugar”. Así, puxeron o foco en que tódalas accións deben asentarse na confianza, a colaboración e unha comunicación fluída entre tódolos actores que interveñen en cada parte do proceso. Tamén fixeron fincapé no impacto dos pequenos detalles que incrementan o sentido de pertenza e o orgullo de formar parte de empresas ou organismos que buscan ter un impacto positivo na sociedade e no medio ambiente. Para chegar a isto, os tres profesionais compartiron co público algunhas das iniciativas que as súas empresas levan a cabo para conseguilo, dos que se extraeron distintas aprendizaxes que poderían aplicarse, así como experiencias de valor.
