Este mércores 5 de febreiro presentouse en Ribeira exposición do XVIII Premio Internacional Jesús Núñez, un acto no que interviñeron a concelleira de Cultura, Antía Alberte, a concelleira de Educación, Cruz Rivadulla e o dinamizador cultural do concello, Unai González. Segundo explicaron, o Premio Jesús Núñez chega á maioría de idade “consolidado como un referente no panorama da arte gráfica nacional, e mesmo internacional, e fiel ao compromiso da Deputación da Coruña no seu labor de mecenado e de apoio ás creadoras e creadores plásticos”.
Fixeron saber tamén que algunhas das obras presentadas ao certame foron incorporándose durante estes dezaoito anos aos fondos da colección da Deputación e “enriquecendo o patrimonio artístico provincial”.
Esta exposición recolle unha escolma dalgúns dos mellores traballos presentados ao certame internacional de arte gráfica co que a institución provincial quere poñer en valor o talento creativo e a figura do artista Jesús Núñez, consolidándose como unha referencia no apoio e promoción de novos talentos nacionais e internacionais da arte gráfica.
Desta volta presentáronse ao premio mais dun centenar de obras de artistas gráficos de 20 países de todo o mundo: México, Uruguai, Cuba, Francia, Italia, Polonia ou Rusia, quedando patente tamén a amplitude de intereses, temáticas, técnicas, procesos e discursos proxectados no conxunto de pezas recibidas.
Resultou gañadora a obra titulada 10 grados, de Juan Carlos Escudero García, que se pode ver xa no Centro Cultural Lustres Rivas e concedéronse dous accésits a Mateusz Patrzyk, pola obra Painbody e a Maite Pinto, por Vero Over.
A peza 10 grados, a obra premiada do artista Juan Escudero, sitúa ao público diante da inmensidade da representación dunha vista aérea e etérea do océano, e na concreción da fluidez da auga como elemento.
A exposición estará aberta ao público no Centro Cultural Lustres Rivas do 5 ao 22 de febreiro, con entrada gratuíta, en horario de luns a venres mañá e tarde e sábados pola mañá.
