Ao abeiro da programación da Mostra de Teatro Escolar 2025, o Teatro Cine Elma da Pobra acollerá este 4 de febreiro, ás 11.00 horas, unha nova función, a cargo de Barafunda Animación. Trátase da peza Os Ourizos, á que asistirá o alumnado de infantil do colexio Fernández Varela e 1º curso de primaria do Salustiano Rey Eiras.
Os Ourizos é unha obra de teatro musical de monicreques (bonecos, de pau e de guante). A obra trata temas de inclusión, integración, amizade e compañeirismo, todo isto envolto en referencias á cultura galega, aos seus paisaxes e ao ecoloxismo. A música, composta especialmente para o espectáculo, inclúe temas de rock, pop e rap, achegando así á rapazada diferentes xéneros musicais.
Organiza a concellaría de Cultura da Pobra do Caramiñal en colaboración coa Rede Cultural da Deputación da Coruña.
Sinopse
Cacho é unha ouriza de terra que vive polos montes dos arredores da ría de Vigo. É unha ouriza moi alegre e moi querida por tódolos seus amigos e veciños, pero todo cambia cando chega a adolescencia e as súas pugas comezan a crecer.
Pouco a pouco todo o mundo comezará a deixala de lado, pero Cacho consegue refuxiarse na música, coa súa guitarra. Grazas a isto coñecerá a outros amigos na súa mesma situación: Rizo, un ourizo de mar moi riquiño, Picho, un señor ourizo de castaña e Flor unha estupenda toxo habitante dos montes galegos. Tamén se atoparán cunha polbo moi rabuda e un esquío metomentodo que non lle facilitarán moito as cousas.
Con todo, os catro amigos conseguirán montar un grupo de rock e cantarán as súas cantigas durante meses ata que en primavera un concurso de bandas fará que todo cambie para eles!
