A área de turismo da Deputación, liderada polo vicepresidente Xosé Regueira, presentou as primeiras xornadas das IXP de Viño de Galicia na provincia, que terán lugar os días 23 e 24 de febreiro no NH Finisterre. Regueira, acompañado do catador e profesor de viño, Luis Paadín e a coordinadora das IXP de Galicia, Maite Maestre, explicaron os detalles dun programa composto por máis dunha vintena de actividades entre presentacións, catas e obradoiros, que contará coa participación de representantes das principais adegas e IXP de Galicia.
O vicepresidente enmarcou este evento na campaña A paisaxe que sabe, “coa que pretendemos humanizar a paisaxe, contando con persoas que viven e producen alimentos, e neste caso viño, de altísima calidade, e este é un valor engadido para os turistas, que encaixa á perfección na nosa estratexia de promoción turística” sinalou.
A coordinadora das IXP de Galicia, Maite Maestre, falou da necesidade de “dar a coñecer as diferencias entre as paisaxes, que se plasman nas diferencias entre culturas e procesos tradicionais que preservamos de viticultura”.
Pola súa parte, Luís Paadín referiuse “ao patrimonio vitivinícola galego”, que é “único” e forma parte “da nosa idiosincrasia”. O sumiller tamén se referiu á necesidade de poñer en valor este sector, así como as pequenas IXP, “que son pequenas porque non tiveron forma de crecer, pero a singularidade dos seus viños e dos seus procesos fanas diferentes e únicas, e complementarias ás outras que temos en Galicia”.
Un total de 16 adegas conforman un programa deseñado co obxectivo de poñer en valor os viños e as adegas da Asociación das IXP de Viño de Galicia, e dividido en dúas xornadas destinadas tanto á cidadanía en xeral como a un público profesional do sector da hostalaría e restauración. A primeira delas, o domingo, contará cun túnel do viño, de 12 a 20h, con catas cada media horas das bodegas Panchín e da Señora (IXP Terras de Navia); Os Areeiros, Ardán 100 Polas; Mercedarios Mosteiro de Poio e Videiras no Mar (IXP Ribeiras do Morrazo) e Adega entre Os Ríos; Castellum Augusti e Cazapitas (IXP Barbanza e Iria). E, a segunda, o luns, comezará ás 11h coas presentacións de Adega Bordel e Adegas Rilo (IXP Viño da Terra de Betanzos); ás 12h coa inauguración e a presentación da web “Viños da Coruña”, con Xosé Regueira; ás 12h coa masterclass a cargo de Luis Paadín; e, de 16h a 18h, presentacións de Pagos de Brigante e Casa Beade (IXP Viño da Terra de Betanzos) e Adega Terras Mancas e Adega Ferreiros (IXP Val do Miño, Ourense). O evento pechará cun obradoiro de Luis Paadín.
