O pasado 17 de xaneiro inaugurouse oficialmente o Programa Integrado de Emprego (PIE) de Dodro 2024-25, no que participan os municipios de Rois, Padrón, Dodro, Catoira, Pontecesures e Valga para formar a 100 persoas demandantes de emprego destes municipios. Na cita participaron os alcaldes dos ditos concellos, incluídos os de Padrón, Rois e Dodro, Anxo Arca, Ramón Tojo e Xavier Castro, respectivamente.
O acto oficial celebrouse no salón de plenos do Concello de Pontecesures, presidido pola súa alcaldesa, Maite Tocino.
O obxectivo do PIE é mellorar a empregabilidade das persoas participantes a través de accións de orientación e asesoramento, formación, técnicas de adestramento (coaching), habilidades sociolaborais e obradoiros de entrevista, fomento da capacidade emprendedora, prospección empresarial, intermediación laboral, prácticas non laborais e obradoiros de mobilidade laboral.
A execución deste programa é posíbel grazas á subvención de 220.000 € concedida por resolución do 30 de setembro de 2024 da directora xeral de Formación e Cualificación para o Emprego da Consellería de Emprego, Comercio e Emigración, ao abeiro do disposto na Orde do 28 de maio de 2024 (DOG nº 112 do 11 de xuño de 2024).
Segundo confirmaron os rexedores, a presentación desta nova edición do Programa Integrado de Emprego tivo moi boa acollida entre as persoas participantes no programa, que encheron o salón de plenos do Concello de Pontecesures.
Os alcaldes e alcaldesa dos concellos participantes destacaron a importancia deste tipo de iniciativas para fomentar o emprego e o desenvolvemento profesional nestes concellos.
