O Concello de Rianxo fixo un breve balance das cifras de desemprego no termo municipal, baseado nos últimos datos publicados pola Consellería de Emprego, Comercio e Emigración da Xunta de Galicia. En base a esta información Rianxo pechou o 2024 con 372 persoas en paro, o que representa o 3,46% da poboación do municipio.
O Concello valorou que “esta cifra non só supón un importante descenso con respecto a como se comezaba o ano, senón que tamén sitúa ao noso municipio no seu limiar máis baixo de desemprego dende que se contabilizan os datos”.
O alcalde, Julián Bustelo, valorou positivamente os datos e destacou algunhas das acción levadas a cabo recementemente en materia de fomento do emprego. “Cos Concellos de Boiro e A Pobra, e co apoio de outras administracións, impulsamos programas que contaron cun investimento de preto de 1 millón de euros, e nos que se vén acadando unha taxa de inserción laboral moi alta”, sinalou.
Entre estas iniciativas atópase o Obradoiro de Emprego Xuventude I, organizado de xeito conxunto polos Concellos de Boiro, A Pobra do Caramiñal e Rianxo e centrado en operacións auxiliares e mantemento de sistemas informáticos.
Ou tamén o Obradoiro Monte Noso de Rianxo centrado na formación en especialidades de repoboacións forestais e tratamentos silvícolas, así como en actividades auxiliares de conservación e mellora de montes.
A maiores, Rianxo, Boiro e A Pobra impulsan un Programa Integrado de Emprego conxunto que na súa última edición acadou o seguinte fito: un contrato de traballo para o 68% das persoas participantes. O desenvolvemento deste programa permitiu mellorar o nivel de empregabilidade de 100 mulleres da comarca do Barbanza a través do traballo realizado en actividades formativas, orientacións laborais individualizadas, prácticas en empresas e prospección laboral. A capacitación incluíu módulos formativos de Envasado, acondicionamento e embalaxe de produtos alimentarios; Elaboración de pezas cárnicas; Sistemas e procesos loxísticos; Mercadotecnia (marketing) en liña; Cociña; Atención ao cliente; Restauración; ou Preparación de produtos do mar.
