O Concello de Padrón anunciou que vai ter unha destacada participación en FITUR 2025, a Feira Internacional de Turismo que se celebrará do mércores 22 ao domingo 26 de xaneiro en IFEMA Madrid. A delegación estará encabezada polo alcalde, Anxo Arca, e a concelleira de Turismo, Chus Campos, quen presentarán novas iniciativas para consolidar o municipio como “un dos principais destinos turísticos de Galicia”, sinalaron, engadindo que entre os obxectivos da presenza padronesa destacan “afianzar os bos resultados acadados o pasado ano e seguir posicionando o concello como referente en tradición, gastronomía e cultura, fomentando ao mesmo tempo un turismo sostíbel e de calidade”.
Explicaron tamén que o municipio de Padrón estará representado na entrada do pavillón, onde está instalado o stand de Galicia, cun tótem a catro caras que destacará os elementos máis significativos do municipio. Ademais, terá visibilidade na localización de Q de Calidade e S de Sostibilidade, certificacións obtidas pola Oficina de Información Turística en 2024 e que serán recollidas na gala organizada polo Instituto para a Calidade Turística Española (ICTE).
O Concello adiantou que un dos momentos álxidos da feira será a presentación oficial de Padrón como Pobo Máxico, unha distinción obtida o pasado ano que “converte ao municipio na primeira localidade da provincia da Coruña e a única de Galicia en lograr este recoñecemento nesta edición”. Esta presentación será o xoves 23 pola mañá e servirá para destacar o carácter singular e o patrimonio cultural da vila.
Padrón tamén será protagonista durante a presentación das Once Xornadas da Lamprea, que se celebrarán os dous últimos fins de semana de marzo. Estas xornadas gastronómicas incluirán numerosas actividades e contarán cunha ampla promoción en FITUR, incluíndo unha reportaxe na revista especializada A Alacena Roja, que se distribuirá durante os días da feira.
Os milleiros de visitantes previstos para FITUR poderán obter información sobre Padrón no mostrador dedicado ao Camiño de Santiago, reforzando o seu papel como punto clave desta ruta xacobea. Ademais, a delegación padronesa asistirá ás presentacións da Traslatio, a Vía Mariana e a nova campaña de Turismo da Deputación da Coruña.
Dentro das actividades programadas, o Concello tamén ten previstas reunións con especialistas do sector e medios especializados, co obxectivo de explorar novas oportunidades e manterse actualizado sobre as tendencias do turismo.
Con máis de 1.100 metros cadrados de espazo, 25 metros de pantallas LED e unha programación diversa, a participación de Padrón en FITUR 2025 subliña “o compromiso do Goberno local co desenvolvemento dun turismo sostíbel, de calidade e respectuoso co seu rico patrimonio natural e cultural”, adiantaron a concelleira Chus Campos e o alcalde Anxo Arca, engadindo que esta estratexia compleméntase cos fitos acadados en 2024, entre os que destaca a culminación do plan de embelecemento da área recreativa da desembocadura dos ríos Sar e Ulla, financiado con fondos NextGenerationEU. Ademais, lembraron que o Concello segue a traballar en proxectos clave como a nova Oficina de Turismo na Praza de Abastos, a renovación do centro histórico e a construción de novos hoteis que reforzarán a capacidade de acollida do municipio.
Balance estatístico do Turismo en Padrón
A presenza de Padrón en FITUR coincide coa presentación do últimos datos turísticos de Padrón, nos que destacan, a nivel de cifras, os máis de 44.000 visitantes atendidos pola Oficina de Turismo ao longo do 2024. “Este aumento sitúa o municipio nunha senda de crecemento sostido, impulsado polo Camiño de Santiago e unha oferta cultural, gastronómica e natural cada vez máis diversa”, explicaron Campos e Arca, salientando que o turismo internacional “foi unha das grandes apostas deste ano, alcanzando o 29% do total de visitantes”, cun incremento do 3% respecto ao 2023. Visitantes de países como Portugal, Estados Unidos e Italia lideran a listaxe.
O alcalde e a concelleira tamén puxeron en valor “a tradición xacobea segue a ser o gran atractivo turístico do municipio”. Así, o 45% das visitas rexistradas foron de peregrinos, aos que se lles expediron 16.068 diplomas da Pedronía e 312 diplomas da Traslatio, que certifican a súa conexión co Camiño de Santiago.
Os meses de verán volveron a concentrar o maior volume de visitantes, con agosto como o mes estrela, acumulando case o 20% das visitas anuais. Pola contra, aínda que o inverno segue sendo unha época de baixa afluencia, rexistrouse unha mellora respecto a anos anteriores, o que evidencia o potencial de atracción en tempada baixa.
En 2024, máis de 2.200 persoas participaron en visitas guiadas ao casco histórico, ao Xardín Botánico Artístico e en actividades teatralizadas. Ademais, a igrexa parroquial de Santiago, onde se garda o emblemático Pedrón, recibiu preto de 80.000 persoas, consolidándose como un dos principais puntos de interese turístico.
O impacto dixital tamén foi relevante. O perfil de Facebook de Turismo de Padrón continúa liderando a comunicación en redes sociais, con máis de 9.200 seguidores, mentres que Instagram superou os 3.100, consolidándose como unha plataforma clave para a promoción do destino. Complementariamente, entregáronse máis de 15.000 planos turísticos a establecementos locais, reforzando a atención directa aos visitantes.
De cara ao futuro, Padrón enfoca os seus esforzos en “aumentar as pernoctacións, mellorar os servizos para autocaravanas e diversificar a oferta turística con propostas que integren o turismo familiar e de natureza”. Estes obxectivos buscan “non só atraer máis visitantes, senón tamén consolidar un turismo sostible que dinamice a economía local e preserve a identidade cultural da vila”.
