O Concello de Padrón recolleu na nova edición de FITUR en Madrid, celebrada a semana pasada (do 22 ao 26 de xaneiro) xuntando unha vez máis o máis representativo dos sectores turísticos estatais, unha importante distinción á súa actividade de promoción. Concretamente, o alcalde de Padrón, Anxo Arca, a concelleira Chus Campos e o técnico de Turismo, Alberto Rey, recolleron as certificacións Q de Calidade Turística e S de Sostibilidade Turística obtidas pola Oficina de Información Turística de Padrón en 2024.
A recepción tivo lugar durante a gala que o Instituto para la Calidad Turística Española y la Sostenibilidad (ICTES) levou a cabo o pasado xoves, 23 de xaneiro, na Galería de Cristal do Palacio de Cibeles e que estivo presidida polo ministro de Industria y Turismo, Jordi Hereu, e do presidente do ICTES, Miguel Mirones.
Nesta mesma gala, o Pazo de Arretén (Iria Flavia) recibiu tamén a Q de Calidade. O Concello deu os parabéns ao grupo Hotel Scala (ao que pertence o Pazo de Arretén) e animou a todos os establecementos locais a “facer de Padrón un destino turístico de relevancia, un destino sostíbel e que destaque pola súa excelencia”.
