597 explotacións beneficiáronse de axudas en 2024 para crear emprego, pagar cotas de autónomos e investir en tecnoloxía avanzada
A Deputación da Coruña, a través do Plan de Emprego Local (PEL), continúa fomentando o desenvolvemento do sector agrogandeiro na provincia. Durante o ano 2024, un total de 597 explotacións agrícolas e gandeiras recibiron axudas destinadas a creación de emprego, modernización das instalacións e financiamento das cotas de autónomos.
O presidente da Deputación, Valentín González Formoso, visitou a granxa de vacún Ramos Alvite, situada na parroquia de Santa María de Maroñas (Mazaricos), onde destacou o impacto positivo destas axudas. Acompañado pola deputada de Mar e Medio Rural, Cristina Capelán Cancelo, e polos propietarios da granxa, Secundino Ramos e Marcos Ramos Alvite, Formoso percorreu as instalacións e abordou os retos e oportunidades do sector primario.
Innovación na granxa Ramos Alvite
A granxa Ramos Alvite, con case 200 vacas, é un exemplo de aposta pola innovación e a tecnoloxía. Entre as melloras realizadas inclúense unha moderna plataforma de ordeño, sistemas de control individualizado para monitorizar a saúde do gando e detectar incidencias, así como equipos automatizados para o mantemento dos establos.
Un dos investimentos destacados é un robot arrimador de comida, adquirido cunha axuda de 17.500 euros do PEL 2024. Este dispositivo autónomo encárgase do suministro de alimento ao gando e da limpeza dos pasillos de alimentación, reducindo significativamente as horas de traballo manual.
Resultados das axudas do PEL no sector primario
O Plan de Emprego Local destinou en 2024 axudas a 597 explotacións da provincia, das cales:
- 90 foron destinadas á creación e mantemento de postos de traballo.
- 99 apoiaron investimentos en modernización e tecnoloxía.
- 639 cubriron o financiamento das cotas de autónomos.
Formoso subliñou que “a granxa Ramos Alvite é un exemplo da aposta pola innovación e as novas tecnoloxías na busca dunha maior eficiencia produtiva” e destacou a relevancia do PEL para fortalecer o sector primario, que continúa a ser un pilar esencial na economía e no emprego rural da provincia.
