O Concello de Rianxo anunciou nesta recta final de xaneiro que vai impulsar a posta en marcha dun Consello Municipal do Mar, unha medida coa que o Goberno de Julián Bustelo quere saír o paso dos datos negativos e preocupantes sobre o estado actual da actividade marisqueira, que poñen de manifesto unha notábel caída da produción na ría de Arousa, na cal “todas as lonxas pecharon o ano cun descenso do 50% nas vendas de bibalvos con respecto á media dos cinco anos precedentes”.
“Con esta iniciativa buscamos aglutinar a todos os axentes implicados na defensa do sector pesqueiro e do sector marisqueiro do municipio e establecer un foro de debate e participación no que abordar a situación que se está vivindo”, sinalou Olalla Figueira, concelleira de Mar e Participación Veciñal, que engadiu que “estamos a traballar nunha proposta de regulamento do Consello que remitiremos ás partes implicadas nos próximos días”. A edil destacou que “é o momento de deixar de lado calquera diferenza para traballar conxuntamente na defensa dun sector produtivo fundamental para Rianxo”.
