O Concello de Muros deu continuidade neste arrinque do ano aos seus traballos para mellorar a accesibilidade e a seguridade nas parroquias. Entre os proxectos rematados atópanse as obras de aglomerado e renovación do pavimento na Rateira, na parroquia de Abelleira. As tarefas desenvolvidas incluíron a estrada principal e os accesos aos núcleos de vivendas, limpando e acondicionando tamén as cunetas.
“Estas obras eran unha demanda da veciñanza de Abelleira, unha actuación necesaria coa que damos continuidade ao noso plan de mellora da rede de camiños e viais municipais”, explicou a alcaldesa, María Lago.
“O orzamento destes traballos supera os 26.000 euros e suporán unha mellora importante para a seguridade viaria nunha estrada do concello moi transitada”, engadiu a concelleira de Obras, Laura Rivadeneira.
Os traballos de renovación da rede de estradas e camiños de Muros continuarán por todo o concello ao longo do ano.
