O Concello de Muros recuperará a antiga Escola Unitaria da parroquia de Serres para o proxecto da Aula Sostible dos Outeiriños. Segundo explicou a alcaldesa María Lago, este histórico edificio acollerá un espazo de traballo colaborativo entre distintas entidades, impulsando “un programa de educación e sensibilización medio ambiental e do sector pesqueiro”, explica a alcaldesa de Muros, María Lago.
En concreto, o proxecto divide a antiga escola unitaria en dúas zonas diferenciadas: por unha banda, no andar baixo habilitarase un lugar adicado á recuperación de plásticos, no que o Concello traballará de forma conxunta coa asociación inclusiva local ADISBISMUR e a Asociación de Mulleres do Mar, colaborando coa Aula Sostible do Freixo. No andar superior haberá un espazo de educación ambiental que acollerá actividades para a veciñanza.
O proxecto ten un orzamento que rolda os 375.000 euros e as obras rematarán no ano 2026. O Concello de Muros aportará 174.837, 69 euros e recibira unha axuda do GALP de 198.878,91 euros.
“Queremos que sexa un espazo totalmente accesíbel, con outro proxecto para recuperar tamén o uso dos exteriores; a rehabilitación da antiga escola unitaria servirá para dinamizar o tecido asociativo da parroquia de Serres e as actividades da veciñanza”, engadiu a alcaldesa de Muros.
Recoñecemento
A rexedora tamén salientou o recente recoñecemento á iniciativa do GALP Costa Sostible, xunto a outros proxectos “que encaixamos nos obxectivos de economía azul, medio ambiente e cogobernanza”.
Ramón Sestayo, presidente de ADISBISMUR recolleu o recoñecemento polo proxecto Pinea; Adela Lestón, presidenta das mariscadoras a pé de Muros, a distinción pola ampliación da Aula Sostible do Freixo, e María Lago o recoñecemento polo proxecto da Aula Sostible dos Outeiriños. Espazo de Educación Ambiental.
