O alcalde de Padrón, Anxo Arca, amosou o seu agradecemento á escritora e perruqueira padronesa Miryam Vidal polo agasallo de tres exemplares do seu primeiro libro, Romeo y yo, á biblioteca municipal, permitindo que a súa obra chegue á veciñanza. A escritora, emocionada, asegurou que para ela “é un orgullo” poder ver a súa obra na biblioteca do seu pobo natal.
Durante unha reunión mantida na alcaldía, Vidal compartiu a súa experiencia e as motivacións que a levaron a escribir Romeo y yo, unha historia de amor entre Soledad Torres, unha escritora viúva, e William Vega, un famoso artista musical, que deben afrontar múltiples desafíos para manter a súa relación. A obra tamén aborda temas como as drogas, o lado oscuro da fama e o choque de culturas e estilos de vida dos protagonistas.
Vidal, de carácter inquedo e cunha gran capacidade de comunicación, explicou que a escrita foi unha terapia persoal durante un momento delicado da súa vida, cando estaba atravesando un divorcio. “Escribir serviume para soportar o proceso no que me atopaba”, recoñeceu. A pesar de non ter pensado en principio en publicar o seu traballo, a escritora decidiu compartir a súa historia por satisfacción persoal, animada pola súa editorial.
Anxo Arca animou a autora a seguir compartindo o seu talento e a continuar escribindo para a súa comunidade. Vidal, que tamén é propietaria da perruquería Fetén en Padrón, non descarta a posibilidade de publicar unha segunda parte da súa historia.
O pasado 11 de xaneiro, Miryam Vidal presentou oficialmente Romeo y yo no auditorio municipal de Padrón, nun acto no que estivo acompañada polos xornalistas Miguel Piñeiro e María Xosé Rodríguez. O evento, que contou coa participación de máis dun cento de persoas, foi un éxito, con moitos asistentes levando exemplares asinados pola autora.
Miryam Vidal, nacida en 1985 e segunda de tres irmáns, iniciou a súa carreira literaria no instituto, escribindo relatos curtos. A súa obra, nacida e creada en Padrón, tamén é un reflexo do seu amor pola súa vila, á que continúa transmitindo aos seus fillos. A escritora agradeceu o apoio do equipo de goberno padronés e destacou que, sexa onde for, sempre levará o nome de Padrón consigo.
