A Casa da Cultura de Caamaño (Porto do Son) vai acoller este domingo 12 de xaneiro un concerto-homenaxe ao que foi director da histórica Banda de Música de Caamaño, Francisco Olveira Santos, e aos músicos que o acompañaron as pasadas décadas na súa importante contribución musical e artística á parroquia sonense e a toda a comarca. O concerto-tributo contará, precisamente, coa presenza da Banda de Música de Caamaño.
Tamén está prevista a actuación da banda local Suevia, destacada agrupación de raizame galega liderada polo músico e docente Pepe Romero.
Dará comezo ás 17.00 na Casa da Cultura. Organiza a asociación local que leva o nome do músico en colaboración co Concello de Porto do Son.
Francisco Olveira Santos pertence á estirpe de músicos que impulsaron e fixeron posíbel a histórica formación, creada en 1912 por Manuel Olveira Paz, pai de José e Francisco Olveira Santos (este último dende 1968 á fronte da Banda de Música, na actualidade liderada polas novas e novos representantes familiares da saga Olveira).
