A sede da Mancomunidade de Municipios Barbanza-Arousa (formada polos concellos de Boiro, Ribeira, A Pobra do Caramiñal e Rianxo) acolleu este xoves 16 de xaneiro unha reunión no marco do proxecto Climability (Solucións inclusivas e sostíbeis para a adaptación do cambio climático). No encontro participaron os alcaldes de Boiro, José Ramón Romero, de Rianxo, Julián Bustelo, da Pobra do Caramiñal, José Carlos Vidal, e de Ribeira, Luís Antonio Barral, e técnicas da Mancomunidade; ante os que se presentaron as principais conclusións sobre impacto do cambio climático na comarca recollidos nun estudo elaborado polo equipo do proxecto.
As persoas encargadas de presentar o traballo realizado ao abeiro da iniciativa foron Cristina Sanmiguel, axente medioambiental da asociación comarcal Amicos, Xoán España, director xeral da entidade, e Lola Gómez, técnica de proxectos da mesma. A finalidade non só foi trasladarlle aos rexedores locais as principais repercusións do cambio climático na comarca, senón presentarlles tamén as solucións baseadas na natureza que poderían aplicarse para frear e adaptarse a este fenómeno.
Esta cita buscou poñer en común o traballo de sensibilización e investigación ambiental realizado por Amicos e os seus colaboradores no marco de Climability cos responsábeis locais para fomentar o deseño de solucións ambientais e a integración do enfoque ambiental na planificación das distintas políticas e estratexias. Estas conclusións aséntanse nun estudo realizado, tamén ao abeiro do programa, co apoio da Fundación Juana Vega. As conclusións do mesmo inciden en como o cambio climático nas comarcas do Barbanza e de Verín, as principais problemáticas ambientais e climáticas nestas zonas e ao análise das posíbeis Solucións Baseadas na Natureza (SBN) que poderían ser postas en práctica.
O cambio climático dende distintos eidos
As responsábeis de Amicos explicaron que Climability non só é un proxecto de activismo sobre o cambio climático, é tamén unha iniciativa de integración social conducida por persoas con discapacidade intelectual. Para iso, un grupo de dez axentes e activistas medioambientais de Amicos participaron en distintas formacións sobre esta temática para especializarse e converterse en promotores das accións de sensibilización e información. O obxectivo é establecer redes inclusivas comarcais de traballo e apoio de iniciativas relacionadas coas solucións baseadas na natureza que permitan unha mellor adaptación o cambio climático.
Climability conta co apoio da Fundación Biodiversidad do Ministerio para a Transición Ecolóxica e o Reto Demográfico, a través da Convocatoria de subvencións para a realización de proxectos que contribúan a implementar o Plan Nacional de Adaptación ao Cambio Climático 2021 – 2030.
