O Multiusos de Rois acolle dende o pasado venres 24 de xaneiro unha destacada mostra de pinturas do artista local Adrián Hermida. A exposición foi inaugurada coa presenza do alcalde Ramón Tojo, e dos concelleiros José Luis Ares e Victoria Quiroga. A mostra, titulada Olladas, recolle paisaxes e retratos realizados por Adrián, creador autodidacta natural de aldea de Barro en Oín (Rois), que segundo el mesmo relatou na inauguración do pasado venres, comezou a facer traballos a lapis cando tiña vinte anos e foi formándose co paso do tempo en diferentes técnicas que se poden apreciar na exposición. As obras están á venda e as persoas interesadas en adquirilas poden facelo poñéndose en contacto co artista grazas ás tarxetas que acompañan a mostra. A exhibición estará aberta ao público con entrada gratuíta ao longo de todo mes, até o vindeiro 28 de febreiro.
