A Asociación Francisco Lorenzo Mariño de Aguiño vai comezar o ano cun amplo programa de actividades culturais: as encadradas na celebración da XX Semana Cultural, que coincidirá co 20º aniversario da fundación da entidade (2005-2025). As iniciativas previstas desenvolveranse os días 17, 18 e 19 de xaneiro con actividades gratuítas e abertas a toda a cidadanía.
Segundo fixo saber a asociación, será unha edición especial que renderá homenaxe a varios fitos históricos na parroquia, como os 50 anos do equipo Xuventú Aguiño. Contarase cunha intervención a cargo do seu actual presidente, Xosé Manuel Vilas Álvarez, e está previsto que participe o historiador e xornalista Xosé María Fernández Pazos, cronista oficial de Ribeira e autor do libro sobre a traxedia do Santa Isabel, recentemente reeditado. A presentación contará coa participación do alcalde de Ribeira, Luis Pérez Barral, e do vicepresidente da asociación organizadora, Unai González Suárez, quen inaugurarán oficialmente a programación. Ademais, estará presente o patrón maior de Aguiño, José Antonio Santamaría, en representación da Confraría de Carreira e Aguiño, que recentemente celebrou o seu centenario (1924-2024).
O acto rematará cunha actuación do grupo de pandereteiras As sete linguas, en homenaxe ás Letras Galegas 2024, dedicadas ás cantareiras galegas. A xornada concluirá cun ágape de fraternidade para todos os asistentes.
O sábado 18 de xaneiro, a programación dará inicio ás 17:00 h cun acto no cemiterio de Porto do Son, onde está previsto realizar a tradicional ofrenda floral anual ao que fora párroco de Aguiño, Francisco Lorenzo Mariño, soterrado no dito camposanto. A carón da tumba do sacerdote, destacada figura da actividade cultural e veciñal da parroquia de Aguiño durante décadas, interpretarase a Marcha do Antigo Reino de Galicia e o Himno Galego. Ás 19:00 h terá lugar na igrexa do Carme de Aguiño unha misa polo 21º aniversario do pasamento de Francisco Lorenzo Mariño.
A xornada culminará ás 20:00 h no conservatorio de Aguiño co espectáculo de humor e música Duo Vaguedades, protagonizado por Isabel Risco e Fran Rei. Trátase dunha proposta de Artefeito Producións na que Risco e Rei interpretan a Rosalía de Castro e Eduardo Pondal nunha peza de teatro cómico para todos públicos.
O domingo 19 de xaneiro será dedicado aos máis pequenos e ás familias. Ás 17:30 h, o multiinstrumentista Paco Nogueiras presentará o seu espectáculo Son Animal, que combinará música e diversión. Para rematar, todos os asistentes recibirán lambetadas e caramelos.
Apoios institucionais e empresariais
A asociación organizadora agradece a colaboración do Concello de Ribeira, a Deputación da Coruña, e empresas como CONRESA, Farmacia Mariño de Aguiño, Digar de Artes, Fabri Barbanza, Fripusa e Combustibles Puebla. Grazas a estes apoios, é posible manter o acceso libre e gratuíto aos actos.
