O Concello de Ribeira informou do remate, esta semana, das obras de mellora e acondicionamento da rúa Mendiño, unha actuación que supuxo un investimento de 109.122 euros, financiadas con fondos Next Generation. Na intervención renováronse de forma integral todos os servizos de saneamento, pluviais e abastecemento de auga para consumo. Ademais plantáronse árbores que contribúen ao embelecemento da cidade no marco do plan de reverdecemento urbano.
Trátase, en palabras do Concello, “dun novo paso de cara ao novo modelo de cidade, máis humana, accesíbel e transversalmente máis verde”.
A actuación en Mediño, rematouse coa colocación da ornamentación vexetal e nos vindeiros día poñerase o mobiliario urbano.
Segundo informou o alcalde, Luís Pérez, a actuación consistiu en facer plataforma única con preferencia ao tránsito peonil que se estenderá dende a actual rúa Mendiño cara a praza Uxío Novoneyra pero tamén cara á rúa Otero Pedrayo e conectará coa praza do Centenario. A isto sumarase tamén a plataforma única proxectada dende o Centenario cara á rúa Avesadas, xerando un espazo a xeito de “adro” para o edificio do auditorio. Por outra banda o rexedor tamén destacou que nas vindeiras semanas mellorarase o tránsito de vehículos coa apertura da rúa Barbanza que aliviará o fluxo do tráfico en Rodríguez Bautista e habilitaranse tamén novas prazas de estacionamento e árbores.
Para o rexedor “estas actuacións integrais facilitan o tránsito peonil para que a veciñanza e a rapazada poida ir máis segura e ademais ponse en valor algunhas rúas de Ribeira que estaban degradadas”.
