Na mañá deste mércores 8 de xaneiro de 2025, a Comisión pola Recuperación da Memoria Histórica do Barbanza (CRMHB) e o Ateneo Republicano de Puerto Real asinaron un documento de irmandade entre as dúas asociacións republicanas.
O acto, ao que asistiron membros das dúas asociacións, tivo lugar no local da Comisión pola Recuperación da Memoria Histórica do Barbanza en Rianxo. O documento foi asinado por Lola Sanisidro, como presidenta do Ateneo Republicano de Puerto Real e Carlos Cimadevila, en calidade de presidente da Comisión pola Recuperación da Memoria Histórica do Barbanza. A sinatura é o resultado da sintonía entre as dúas asociacións e da converxencia dos seus obxectivos.
O Ateneo Cultural Republicano de Puerto Real, entidade domiciliada en Puerto Real (Cádiz), ten entre os seus fins o estudo e divulgación do Republicanismo Histórico Español, e os seus valores cívicos, a creación dun fondo documental sobre o Republicanismo en España; e o estudo, promoción e defensa da República como sistema político.
Pola súa banda, A Comisión pola Recuperación da Memoria Histórica do Barbanza, diríxese a recuperar a memoria histórica de Galiza (“porque non pode entenderse o presente e construír o futuro se ignoramos o noso pasado”, sinálase nos seus estatutos) e a recuperar e divulgar a memoria histórica de todos aqueles cidadáns galegos, homes e mulleres de diversas ideoloxías, que, tras o levantamento militar antidemocrático e inconstitucional de 1936, foron asasinados, pasaron á resistencia armada na guerrilla antifranquista, foron perseguidos e encarcerados até o exterminio ou tiveron que padecer a emigración e o exilio. Tamén ten entre os seus obxectivos coordinar, dar pulo e axudar no traballo de cantas persoas e entidades, tanto públicas como privadas, realicen actividades encamiñadas á recuperación da memoria histórica da loita galega antifascista, en xeral, e antifascista, en particular.
