Hai un ano, as costas galegas sufriron un desastre ambiental de gran magnitude. O cargueiro Toconao derramou 26 toneladas de pélets plásticos, pequenos gránulos que formaron unha marea branca no litoral galego e cántabro. “Este incidente”, explican dende Ecoloxistas en Acción, “non só danou gravemente o ecosistema mariño, senón que tamén puxo en risco ao sector pesqueiro e marisqueiro, ao afectar a biodiversidade e os recursos marítimos”, ademais de “evidenciar a necesidade urxente de reforzar as medidas de prevención para evitar futuros desastres deste tipo”.
A organización denunciou nun comunicado que este tipo de contaminación persiste en zonas como Tarragona de forma crónica.
Ecoloxistas en Acción, Low Impact Fishers of Europe – LIFE, Mulleres Salgadas, Surfrider España, Good Karma Projects, Noia Limpa e The Pew Charitable Trusts instan nun comunicado para adoptar normativas máis ambiciosas para previr futuros accidentes.
Estas organizacións explican que “aínda que as organizacións pesqueiras, marisqueiras e ecoloxistas celebran os recentes avances no regulamento europeo para previr a perda de bólas plásticas, a normativa actual presenta importantes eivas, e o transporte marítimo, protagonista en incidentes como o do Toconao, podería quedar fóra do seu alcance”. Isto, din, “sería un erro crucial, xa que reforzar a seguridade no transporte, con embalaxes máis resistentes e medidas de estibado adecuadas, é esencial para evitar futuras verteduras ao mar”.
Ademais, explican, a contaminación crónica en zonas industriais que constitúen gran parte das perdas destas partículas plásticas anuais, como a que acontece en Tarragona, “evidencia a falta de controis efectivos,” e como consecuencia, miles de bólas plásticas terminan anualmente no Mediterráneo, afectando gravemente á fauna mariña e ás comunidades costeiras. “Para abordar este problema, é crucial que todas as empresas e instalacións que manipulan estes materiais implementen plans obrigatorios de prevención, contención e limpeza ante posibles fugas”, engade o comunicado.
Nas súas demandas, tamén se inclúe a creación dun sistema de certificación independente que supervise o cumprimento destas medidas. “Sen auditorías rigorosas e un protocolo claro de notificación e restauración en caso de incidentes, a responsabilidade polos danos queda nun limbo que prexudica tanto aos ecosistemas como ás comunidades humanas que dependen dun mar saudable”, explícase.
As organizacións insisten en que a situación actual esixe actuacións máis decididas: “Tanto en Galicia como no Mediterráneo, as verteduras de pélets plásticos ameazan a biodiversidade, as cadeas alimenticias e os modos de vida tradicionais dos pescadores e comunidades costeiras. Non podemos permitir que estes materiais sigan escapando ao mar”.
