Preto dun cento de persoas xa formalizaron a súa inscrición na Andaina Solidaria / Belén de Cumes, que o Concello de Lousame organiza este sábado 14 de decembro. Unha iniciativa solidaria na que as inscricións estarán abertas ata as 23:59 horas deste mércores 11 de decembro en emesports.es por un prezo de 6€ (de balde para menores de 10 anos).
A concelleira de Cultura, Silvia Agrafojo, explicou que “todo o recadado será destinado ás persoas damnificadas pola dina de Valencia, polo que dende o Concello de Lousame animamos a todas as persoas a participar nunha iniciativa solidaria e desfrutar dun interesante percorrido pola natureza lousamiá, con fermosas e espectaculares vistas á ría de Muros Noia e á ría de Arousa”.
As persoas participantes concentraranse na praza do Concello ás 10:00 horas do sábado 14 de decembro, dende onde se desprazarán ata o monte Iroite en autobuses achegados por Autos Comparado. Dende aló partirá unha baixada duns 10 km ata a capela da Nosa Señora da Gorgosa (Camboño), onde se montará o tradicional Belén de Cumes. Este típico Nacemento está composto por figuras de gran tamaño e cada ano se monta nunha igrexa do municipio, quedando aló para ser desfrutado pola veciñanza da parroquia durante o Nadal.
“Baixaremos por un camiño de piñeiros cara o miradoiro da Balconada, cunhas vistas espectaculares da ría, e desde aló iremos por pistas de monte ata a aldea de Soutelo, dende onde continuaremos ata a ermida da Gorgosa, onde reporemos forzas cun chocolate con churros da man de Churrería Rafa e desfrutaremos dunhas panxoliñas da voz de Chiña”, sinala Germán Romero, técnico de Deportes de Lousame. A volta en bus á praza do Concello está prevista para as 14:30 horas.
O evento está organizado polo Concello de Lousame e conta coa colaboración da Cruz Vermella de Noia, Protección Civil de Lousame, Autos Comparado e a rede de voluntariado de Lousame.
