O Concello de Ribeira deu inicio aos labores de acondicionamento dunha nova senda peonil que conectará as localidades de Teira e Corrubedo, co propósito de mellorar a seguridade e a accesibilidade para os peóns no ámbito rural. Esta iniciativa busca substituír a antiga pasarela de madeira, que se atopaba en mal estado, por un camiño máis duradeiro e de baixo mantemento.
Os traballos iniciáronse a semana pasada coa retirada completa da estrutura de madeira e inclúen diversas actuacións como a limpeza, escavación, explanación, desherbado, retirada de terra vexetal e nivelación do terreo. Estas accións están a levarse a cabo na estrada AC-303, no acceso a Teira en dirección a Corrubedo.
Xabier Vidal, concelleiro de Obras, destacou a importancia desta actuación: “O acondicionamento desta senda é unha demanda da veciñanza da parroquia que asumimos como parte do noso compromiso por mellorar a seguridade e a calidade de vida no rural. Queremos crear un camiño que non só facilite o tránsito, senón que sexa sostible e se manteña en bo estado ao longo do tempo”.
O goberno local reafirma así a súa aposta por desenvolver infraestruturas adaptadas ás necesidades da veciñanza, contribuíndo á mellora da mobilidade e á seguridade peonil no municipio.
