Os socialistas de Rianxo emitiron un comunicado coincidindo coa recta final de ano e no que, a xeito de balance, reafirman o seu compromiso cunha xestión transparente e eficaz das contas públicas e trasladan á veciñanza a súa satisfacción por “ter desempeñado o grupo un papel clave no último ano, permitindo que o Concello avanzase cara ao saneamento das súas contas”. Engaden que “non houbo proposta máxica, senón o a mobilización dunha cantidade próxima aos 2,2 millóns de euros a gasto corrente, atendendo as necesidades da veciñanza, e con cargo ao POS adicional 2023 e ao remanente de tesourería 2022 e 2023”. Explican que “este esforzo colectivo no que os socialistas xogamos un papel importante” e “onde o 59,2% das facturas aboadas correspondan ao período comprendido entre setembro e decembro de 2023, xa baixo o actual Goberno municipal de Julián Bustelo”, fixo posíbel procesos clave como o pago de servizos imprescindíbeis e reforzou a estabilidade económica do Concello “nun momento clave para o seu desenvolvemento”.
Os socialistas apuntaron no comunicado que a súa proposta de oposición foi “responsábel e comprometida” e que ao longo dos doce meses que deixamos atrás “o obxectivo foi garantir a viabilidade das contas municipais, sempre poñendo por diante os intereses da veciñanza de Rianxo, e onde as nosas iniciativas e posicións construtivas contribuíron a estabilizar as finanzas municipais, facilitando solucións para atender gastos prioritarios, impulsar unha xestión transparente e eficaz, asegurando que os recursos públicos sexan empregados de forma eficiente, e dar apoio ás necesidades urxentes do día a día, desde os servizos básicos ata o mantemento de proxectos clave”.
Cara ao futuro: planificación e rendición de contas
No balance fan saber que “entendemos que, para seguir avanzando, é fundamental que as contas xerais reflictan de forma clara e actualizada a realidade económica do Concello, e desde o PSOE de Rianxo, reafirmamos o noso compromiso coa transparencia e a responsabilidade institucional, apostando por unha xestión que priorice a planificación e o cumprimento dos prazos legais; por iso, consideramos que a presentación da conta xeral de 2023 non só é un requisito normativo, senón tamén unha oportunidade para avaliar os logros acadados e planificar con rigor os orzamentos futuros”. Para o grupo, este documento permitirá reforzar a confianza da cidadanía e garantir unha xestión acorde coas necesidades do municipio. “A importancia deste documento está recoñecida pola lexislación, que fixa como data límite o 15 de outubro para a súa presentación”, apuntan seguindo este fío, salientando a súa intención de trasladar á veciñanza a súa preocupación “ante un feito sen precedentes na historia recente do noso concello: a non presentación da conta xeral en prazo (15 de outubro), e coa perspectiva de que non se aprobará de forma definitiva antes de acabar este ano 2024”.
