O Concello de Muros celebra este sábado 21 de decembro a súa I Gala do Deporte no Auditorio do Centro Cultural e Xuvenil (18:30 horas).
O Goberno local presentou este martes 17 os detalles da cita, “un encontro para recoñecer o traballo que realizan a diario os clubs e deportistas de Muros, unha gala emotiva e con moitas sorpresas á que convidamos a toda a veciñanza”.
“O deporte forma parte de Muros, sempre cuns valores que se transmiten de xeración en xeración, con moitas persoas e entidades vencelladas que merecen un recoñecemento”, asegurou a alcaldesa, María Lago.
Pola súa banda, o concelleiro de Deportes, Damián Torea, destacou “a gran receptividade que tivo a gala entre o deporte local, unha iniciativa moi necesaria no Concello de Muros para dar visibilidade ao noso deporte”. “O evento do sábado será unha festa”, engadiu.
Na gala entregaranse os premios á mellor deportista feminina do Concello de Muros; mellor deportista masculino; mellor club do Concello de Muros; promesas feminina e masculina máis destacadas, e mellor evento deportivo municipal.
Haberá tamén un premio da veciñanza a través de votación popular, un recoñecemento especial do concello e ata tres mencións especiais.
