A Concellaría do Benestar Animal da Pobra do Caramiñal e a Protectora Moura impulsan esta tempada de Nadal unha campaña co obxectivo de fomentar as adopcións responsábeis de animais. Baixo a mensaxe de “Queridos Reis Magos… este Nadal non quero ser un capricho, quero unha familia responsable!” convídase a dar fogar a algúns dos animais que neste momento se atopan no refuxio municipal.
Durante a semana pasada, a Protectora Moura repartiu folletos entre o alumnado dos CEP Salustiano Rey Eiras, CEP Pilar Maestú Sierra e EEI Fernández Varela.
O alcalde e titular da Concellaría do Benestar Animal, José Carlos Vidal, explicou que se promove esta acción para seguir traballando na defensa e protección dos animais. “Esta é unha mostra máis do noso compromiso co benestar animal e de seguir concienciando á cidadanía sobre a responsabilidade que supón ter unha mascota, o que se traduce no seu coidado, atención e bo trato”, apuntou o rexedor. Por iso, a Administración local e a Protectora Moura unen forzas, unha vez máis, dentro da súa liña de colaboración.
As persoas interesadas en sumar un novo membro aos seus fogares tan só teñen que poñerse en contacto a través do enderezo electrónico protectoramoura@gmail.com ou do Whatsapp 604030396. Tamén se poden facer doazóns económicas á entidade para axudarlle a sufragar os gastos veterinarios e de alimentación dos animais aos cales presta asistencia: ES10 0133 4751 6842 0000 5622.
