O Concello de Muros compartiu nas redes o cartel da I Gala do Deporte local, que tamén ten abertas as votacións populares para elixir o máis destacado do ano no termo municipal.
Segundo confirmou o Concello, na I Gala do Deporte do Concello de Muros, que se celebrará o vindeiro sábado 21 de decembro, hai unha categoría na que os veciños/as teñen que elixir ao seu deportista favorito, cunha votación popular que xa está aberta na web municipal, nun apartado específico.
“Trátase dun evento moi agardado por todo o mundo deportivo do noso concello. É hora de darlle a visibilidade que merece”, comentou a alcaldesa, María Lago, acerca dese novo acontecemento festivo para celebrar a actividade deportiva do concello e a importante canteira de talentos novos e consagrados que atesoura.
“A Gala do Deporte é unha iniciativa do Goberno local que tivo unha moi boa acollida, temos varias candidaturas en todas as categorías e quero agradecer a clubes e deportistas a súa colaboración”, afirmou pola súa parte o concelleiro de Deportes, Damián Torea, que adianta “moitas sorpresas o día 21”.
