A bordo ían tres persoas, das cales dúas foron rescatadas con vida, mentres un terceiro tivo que ser rescatado do interior do barco por mergulladores.
O corpo xa sen vida foi trasladado ao peirao máis próximo e os dous superviventes recibirán asistencia especializada a través dos facultativos do Centro de Saúde.
Ás 9:30 horas, o 112 Galicia recibiu a primeira chamada de auxilio desde Porto Meloxo, no Grove. O alertador avisou do afundimento dun barco no polígono bateeiro de Meloxo. Indicou que había dúas persoas fóra da auga, sobre unha lancha, e unha desaparecida, posiblemente no interior da embarcación.
Para o rescate, organizouse un operativo formado por rescatadores de Salvamento Marítimo, Servizo de Gardacostas de Galicia, Servizo Municipal de Protección Civil do Grove, GES de Sanxenxo, axentes da Garda Civil e da Policía Local e profesionais de Urxencias Sanitarias de Galicia-061.
Sen embargo, a persoa desaparecida estaba dentro da embarcación, que xa tiña a proa completamente ao sol, e a única forma de localizala era mediante a inmersión. Así, un mergullador da zona descendeu e atopou o corpo sen vida do mariñeiro.
Mentres, os outros dous tripulantes, que estaban a salvo, foron trasladados a porto noutro barco, o Polaris, e despois ao Centro de Saúde da localidade para someterse a unha valoración médica. Se ben, fisicamente, presentaban un bo estado, posiblemente, necesiten axuda especializada. Cómpre sinalar que os implicados eran tres membros da mesma familia, que traballaban a bordo da embarcación afundida.
Cando foi rescatado, o cadáver foi conducido por outra embarcación, o “Nuevo Moldes” ao mesmo peirao de Meloxo para continuar co procemento habitual de recoñecemento e identificación.
