A figura de Rosalía de Castro centra esta semana dúas importantes citas culturais, con conexións directas ao firmamento.
O 17 de decembro de 2019 a Unión Astronómica Internacional designou oficialmente co nome de Rosalíadecastro unha estrela na constelación do Serpentario. Para celebrar o quinto aniversario dese fito histórico a Agrupación Astronómica Coruñesa Ío, entidade promotora da campaña en
favor da estrela Rosalía, organiza esta semana dúas actividades:
-No auditorio da Casa de Rosalía en Padrón o propio martes 17 de decembro, ás 19h, haberá un relatorio a cargo de Martin Pawley co título O ceo de Rosalía no que a astronomía virá dada a partir dos textos da escritora. A entrada é libre. Máis información, na web da Fundación Rosalía de Castro.
-O 18 de decembro, mércores, ás 19:30, no Planetario da Casa das Ciencias, baixo o mesmo título, O ceo de Rosalía, Martin Pawley contará historias da astronomía a través dos textos da nosa poeta e vivirase unha sesión especial de planetario arredor da escritora e a súa estrela da man dos Museos Científicos Coruñeses. A actividade é gratuíta até completar a capacidade da sala e non require inscrición previa. As entradas empezarán a repartirse a partir das 19:15 na entrada da Casa das Ciencias. Non se permite o acceso unha vez iniciada a actividade. Temos máis información na web da Agrupación Ío.
Martin Pawley (A Coruña, Galicia, 1974) é crítico (Nós Diario, Caimán Cuadernos de Cine, blog Acto de primavera), programador e produtor de cinema (Costa da Morte de Lois Patiño, 2013). Como divulgador científico especializado en astronomía colaborou en diversos programas de radio e dende 2019 publica un artigo sobre contaminación luminosa cada mes na revista Astronomía. Gañou o premio da Federación de Asociaciones Astronómicas de España ao mellor divulgador astronómico en 2018. É membro dende 2002 da Agrupación Astronómica Coruñesa Ío, entidade gañadora dunha mención de honor nos Premios Prismas da Casa das Ciencias en 2020, o Premio Rosalía de Castro de lingua da Deputación da Coruña en 2021 e o Premio da Crítica de Galicia na categoría de Iniciativas Culturais e Científicas en 2023.
