Seguen en Porto do Son as actividades para a rapazada do I Ciclo Cultural Infantil Itinerante. Este domingo 17 de novembro será a quenda do músico multiinstrumentista Paco Nogueiras, que achegará o seu espectáculo Radio Bulebule. Será na Casa da Cultura de Caamaño a partir das 18.00 horas.
A entrada é gratuíta até completar o aforo do recinto (non será preciso recoller entradas).
Organiza a Área de Cultura de Porto do Son en colaboración coa Deputación da Coruña.
En Radio Bulebule Paco Nogueiras rende homenaxe á comunicación radiofónica e á súa capacidade para facernos chegar mensaxes a prol da diversidade, o coidado do medio, a vida saudábel ou a cultura e a lingua galega. Radio Bulebule é, en palabras do seu creador, “unha radio itinerante, ambulante e cantante que retransmite para o mundo en linguaxe universal”. Paco Nogueiras convídavos neste espectáculo a vivir a radio en directo nun divertidísimo programa cheo de humor, baile e cancións. Temos de todo: deportes, servizos informativos, o tempo, axenda cultural. Trátase pois da “mellor guía para descubrir as últimas tendencias, e mesmo para crear xuntos un gran éxito vogal”.
Traballo premiado na categoría de Música Infantil nos VIII Premios Martín Códax da Música celebrados no ano 2021.
