Pablisimo visita Baroña este domingo ao abeiro do I Ciclo Cultural Infantil Itinerante de Porto do Son

Prosegue a primeira edición do Ciclo Cultural Infantil Itinerante de Porto do Son, impulsado pola Área de Cultura municipal co apoio de entidades como a Deputación. A seguinte cita será esta fin de semana, o domingo 10 de novembro, co espectáculo Cabicivai de Pablísimo, compañía especializada en narración oral, teatro de animación á lectura e teatro infantil creada polo actor, dramaturgo e contador de historias Pablo Sánchez.

Cabicivai é una función producida por Urdime para público infantil e familiar de 45 minutos de duración, aproximadamente. A sinopse é sinxela: trátase dun espectáculo sobre rodas, cunha bicicleta, un kamishibai e tres caixóns “dos que pode saír calquera cousa”. Será este domingo 10 na Casa da Cultura de Baroña, a partir das 18.00 horas e con entrada gratuíta (non é preciso recoller entradas).

Segundo adiantan dende o Concello, os espectáculos de Pablísimo, de pequeno e mediano formato, toman sempre como base a literatura infantil a través de contos clásicos, contemporáneos, e contos de creación propia.

Pablísimo leva producidos máis de vinte espectáculos mesturando neles monicreques, música en vivo, teatro de sombras, video e narración oral. E ten participado en diferentes mostras e festivais.