A VII Mostra Internacional de Cinema Documental Mares da Fin do Mundo celebrou a última das cinco xornadas programadas este domingo 3 de novembro. O evento, organizado pola Asociación Cultural Mares da Fin do Mundo e patrocinado pola Deputación da Coruña, a Xunta de Galicia e o Concello de Ribeira, arrancou a última xornada coa derradeira saída programada das históricas embarcacións Joaquín Vieta (balandro) e Chasula (tarrafa), permitindo aos asistentes desfrutar das paisaxes da ría de Arousa.
As sesións da tarde comezaron co pase da sección Popa, dedicada á proxección de arquivos e filmes históricos. A sección contou coa colaboración da Cineteca de Bologna, a través da proxección de catro filmes que forman parte dunha serie de curtametraxes documentais que o gran cineasta italiano Vittorio De Seta rodou a mediados do século pasado na illa de Sicilia. Trátase de catro obras neorrealistas nas que o mar e a pesca ocupan un lugar central. As obras proxectadas foron: O tempo do peixe espada (1954), Illas de lume (1954), Campesiños do mar (1956) e Barcos de pesca (1958). Ademais destes catro filmes, proxectouse unha entrevista realizada a Vittorio De Seta no marco do festival II Cinema Ritrovato no ano 2006.
A continuación, comezou o acto de clausura desta VII edición de MDFDM coa entrega de premios aos filmes gañadores da Competición Oficial. O xurado, composto por Ángel Sánchez, Xisela Franco e Brais Romero, decidiu outorgar o Premio a Mellor Película (trofeo Heroínas de Sálvora e unha dotación económica de 2 000 €) a Koka, de Aliaksandr Tsymbaliuk”, “un filme que, a través dun delicado, honesto e sutil uso da cámara, fainos partícipes do estreito e tenro vínculo entre un pai e un fillo, achegándonos un retrato conmovedor cunha cinematografía exquisita e un deseño sonoro envolvente que nos transporta á vida cotiá dunha aldea costeira que parece vivir fóra do tempo”. Así mesmo outorgou unha mención especial a Percebes, de Alexandra Ramires e Laura Gonçalves, “pola súa orixinalidade no seu achegamento ao percebe, pola súa elegancia no uso da acuarela e da animación 2D, e por presentar con frescura e gran sentido do humor o ciclo de vida deste molusco tan apreciado, ao tempo que amosa unha mirada crítica sobre a realidade do turismo no Algarve”.
O Premio do Público (trofeo O Faro e unha dotación económica de 1 000 €) da sétima Mostra Mares da Fin do Mundo, outorgado polos asistentes ao festival a través das súas votacións, foi para Vogage de Documentation de Madama Anina Conti, de Louise Hémon.
Durante o acto de clausura entregáronse tamén os diplomas ás alumnas participantes no Obradoiro de Cinema con Móbiles, onde da man de Marcos Gallego, Raquel Enríquez e Eva Lodeiro, tomaron contacto coa cinematografía e o tratamento narrativo do seu entorno patrimonial, social e medioambiental. A continuación proxectouse O Xurelo: un barco de valentes, filme realizado durante o Obradoiro polas alumnas do IES No 1 de
Ribeira Noa Caamaño Caamaño e Alba Lustres Fariña nesta actividade de formación de novos públicos. No filme as directoras homenaxean ao patrón ribeirán Anxo Vila e á súa tripulación, que, a bordo do Xurelo, convertéronse en referentes da loita ambiental denunciando o vertido de residuos radioactivos na foxa atlántica.
Como colofón a esta VII edición de MDFDM, proxectouse Voces da Conserva, de Lesmes Iglesias (España/Galicia, 2023), filme que narra o auxe da salgadura e os comezos da conserva hermética en Barbanza–Arousa, dende os pioneiros e fomentadores autóctonos ata os emprendedores chegados de Cataluña. O filme aborda tamén a transformación do sector e os cambios provocados por crises, conflitos e guerras, así como o valor da industria e do produto como eixes do desenvolvemento económico e base da subsistencia da poboación durante máis dun século.
A organización do certame rematou o evento facendo balance desta convocatoria: “Esta primeira edición da Mostra Internacional de Cinema Documental Mares da Fin do Mundo celebrada en Ribeira, deixounos grandes sensacións. Ribeira, ao igual que a Mostra, é unha vila estreitamente vinculada ao mar e á súa cultura e tradición marítima. Agradecemos a todas as persoas que nos acompañaron estes cinco días, e animamos a todo o mundo a volver á VIII edición lembrando unhas palabras de Luís Pérez, alcalde de Ribeira, cando na inauguración citaba: convirtamos este festival no evento que engrandeza a cultura e a inmensidade do mar que nos rodea”.
A Mostra Internacional de Cinema Documental Mares da Fin do Mundo está organizada pola Asociación Cultural Mares da Fin do Mundo, coa colaboración na dirección e produción de ABA Films e o apoio, entre outros, da Deputación da Coruña, a Dirección Xeral de Política Lingüística da Xunta de Galicia e o Concello de Ribeira. Así mesmo, MDFDM forma parte de Proxecta (Coordinadora Galega de Festivais de Cinema, integrada na federación estatal Pantalla).
