O Concello de Outes compartiu os horarios dos distintos locais nos que se servirán as tapas da 3ª edición do concurso local enOutes de Tapas!, cuxa nova edición vaise desenvolver a partir desta fin de semana, os días 22, 23, 24, 29 e 30 de novembro e máis o 1 de decembro.
A través deste certame, veciñanza e visitantes poderán degustar e valorar as racións en formato pequeno deseñadas pola hostalaría local especificamente, para este evento. Nesta edición participarán 8 establecementos e a cidadanía valorará as tapas que probou a través dun “pasaporte” no que se cuñarán as visitas aos diferentes locais que vaia realizando. Entre as persoas que valoren as tapas sortearase unha cea para dúas persoas. Este ano participan Asador Albatros, A de Vila, Pepe do Coxo, O Taboleiro, John Turkey, Centro Social, Areal e Restaurante Fera.
Lembrar que na II edición do #enOutesdeTapas, certame local impulsado co obxectivo de reivindicar a gastronomía do municipio e visualizar e dinamizar o bo facer do sector hostaleiro, a tapa mellor valorada e que recibiu o premio conxunto dos membros do xurado e dos participantes foi o Polbo crocante (Pulpo crujiente) do Restaurante Pepe do Coxo, do Freixo. Segundo informou o Concello a xeito de balance, na edición 2023 servíronse case 5.500 tapas (o dobre que en 2022) e cunhas valoracións moi altas, tanto por parte dos participantes coma dos membros do xurado.
