O Concello de Boiro financiou a posta en valor da Casa dos Veciños de Mieites mediante un convenio asinado ao Comunidade de Montes Veciñais en Mancomún de Mieites. O alcalde, José Ramón Romero, e o concelleiro de Urbanismo e Obras, Luis Ruiz, visitaron ese 7 de novembro as actuacións realizadas, encamiñadas a poñer o inmóbel plenamente operativo a disposición da veciñanza.
Mediante unha subvención de 50.000 euros do Concello de Boiro levouse a cabo a mellora do centro coa colocación de novos forxados, renovación do teito, carpinterías de aluminio e outros elementos. “Estamos moi contentos de colaborar con asociacións para levar a cabo este tipo de actuacións que redundan na consecución de servizos para os veciños dun núcleo como neste caso é o de Mieites”, afirmou o concelleiro de Urbanismo e Obras.
Os usos deste espazo serán fundamentalmente sociais para a comunidade de montes e asociación de veciños tales como xuntanzas, actividades… “Imos seguir traballando nesta liña xa que é a forma de dar servizo ás necesidades dos veciños, fomentando unha zona de encontro para a veciñanza e recuperando o patrimonio”, recoñeceu o alcalde.
